لما بتدخل عالم التداول في البورصة أو الفوركس، لازم تبقى عارف إن في أكتر من نوع لأوامر البيع والشراء. كل نوع ليه استخدامه حسب الاستراتيجية اللي ماشي بيها أو حسب حركة السوق. تعالوا نفهم سوا الأنواع دي بشكل بسيط:
أمر السوق – Market Order
ده أبسط وأسرع نوع من الأوامر. لما بتستخدم "Market Order"، يعني بتقول للمنصة: اشتريلي أو بيعلي بأفضل سعر موجود دلوقتي في السوق.
📌 مثال: لو سعر سهم معين دلوقتي 100 دولار، وأنت عملت Market Order للشراء، هتشتري بالسعر ده أو قريب منه جدًا.
🟢 ميزة: بيتنفذ فورًا
🔴 عيب: ممكن السعر يتغير بسرعة وانت مش واخد بالك (خصوصًا في الأسواق السريعة زي الفوركس).
الأمر المعلق – Limit Order
ده لما تحط أمر شراء أو بيع بسعر معين أحسن من السعر اللي موجود حاليًا في السوق.
- Buy Limit Order: لما تحط أمر شراء بسعر أقل من السعر الحالي.
- Sell Limit Order: لما تحط أمر بيع بسعر أعلى من السعر الحالي.
📌 مثال: لو سهم دلوقتي بـ 100 دولار، وانت شايف إنه لو نزل لـ 95 يبقى فرصة، تحط Buy Limit عند 95. أول ما يوصل السعر لـ 95، بيتنفذ الأمر.
🟢 ميزة: بتتحكم في السعر
🔴 عيب: ممكن الأمر مايتنفذش لو السعر ماوصلش للنقطة اللي انت حاططها.
أمر الإيقاف – Stop Order
ده عكس الـ Limit شوية. هنا بتقول للمنصة: نفذلي أمر شراء أو بيع لما يوصل السعر لنقطة معينة، علشان أكسب من كسر الاتجاه أو أحمي نفسي من الخسارة.
- Buy Stop Order: لما تشتري بسعر أعلى من السعر الحالي (متوقع يكمل صعود).
- Sell Stop Order: لما تبيع بسعر أقل من السعر الحالي (متوقع يكمل هبوط).
📌 مثال: سعر سهم 100 دولار، وانت شايف إنه لو كسر 105 هيكمل طلوع. تحط Buy Stop عند 105.
🟢 ميزة: كويس للمتداول اللي بيشتغل على الكسر (Breakouts)
🔴 عيب: ممكن السعر يكسر ويرجع تاني (فالس كسر).
أمر الإيقاف مع الحد – Stop-Limit Order
ده مزيج بين الـ Stop والـ Limit. بتقول فيه: لو السعر وصل للنقطة الفلانية (نقطة التفعيل)، نفذلي أمر Limit عند سعر معين.
📌 مثال: السعر دلوقتي 100، وعايز تشتري لو كسر 105، بس مش عايز تدفع أكتر من 107. فبتحط Stop عند 105 وLimit عند 107.
🟢 ميزة: بتحط شروط أكتر وتحمي نفسك
🔴 عيب: ممكن السعر يوصل للـ Stop بس ما يوصلش للـ Limit، وساعتها الأمر مايتنفذش.
أمر وقف الخسارة – Stop Loss Order
ده أمر بيستخدم لحماية نفسك من الخسارة. بتحطه عشان تخرج من الصفقة لو السعر مشي عكس توقعك.
📌 مثال: اشتريت سهم بـ 100 دولار، وحاطط Stop Loss عند 95. لو السعر نزل، بيتباع تلقائي عند أو قريب من 95.
🟢 ميزة: بيحميك من الخساير الكبيرة
🔴 عيب: لو السوق عمل حركة سريعة، ممكن يتنفذ بسعر أسوأ من اللي انت محدده.
أمر جني الأرباح – Take Profit Order
ده العكس من وقف الخسارة. بتحطه عشان تقفل الصفقة تلقائي لما توصل للربح اللي انت مستهدفه.
📌 مثال: اشتريت سهم بـ 100 وحاطط Take Profit عند 110. لما يوصل 110، المنصة تقفل الصفقة وتضمن الربح.
أمر "صالح لحد ما تلغيه" – Good 'Til Cancelled (GTC)
ده مش نوع من أوامر الشراء أو البيع في حد ذاته، لكن هو مدة صلاحية الأمر. يعني لما تحط أمر (زي Limit أو Stop)، ممكن تختار إنه يكون "GTC"، يعني يُفضل موجود لحد ما انت بنفسك تلغيه.
📌 مثال: حطيت Buy Limit لسهم عند 90 جنيه وهو دلوقتي بـ 100، واخترت GTC. الأمر هيفضل موجود في المنصة مهما مر وقت، لحد ما يتنفذ أو تلغيه بإيدك.
🟢 ميزة: مناسب للمستثمر اللي بيستنى فرص معينة
🔴 عيب: ممكن تنسى أمر قديم موجود والسوق يوصل له وأنت مش واخد بالك
أمر الإيقاف المتحرك – Trailing Stop Order
ده أمر عبقري لحماية الأرباح. هو نوع من أوامر وقف الخسارة، لكن بيتحرّك مع السعر في الاتجاه اللي فيه ربح.
لو داخل صفقة شراء، Trailing Stop بيتحرك مع كل طلوع للسعر، لكن ما بينزلش.
لو السعر رجع ونزل بمقدار معين (مثلاً 5 جنيه)، يتنفذ الأمر ويقفل الصفقة.
📌 مثال: اشتريت سهم بـ 100 جنيه، وحاطط Trailing Stop بـ 5 جنيه. لو السعر طلع لـ 110، وقف الخسارة هيبقى 105 تلقائي. لو نزل السعر لـ 105، الصفقة تقفل وتاخد ربح 5 جنيه.
🟢 ميزة: بيحمي الأرباح من الرجوع العكسي
🔴 عيب: ممكن السوق يتحرك بشكل متذبذب ويطلعك من الصفقة بدري
تعليقات
إرسال تعليق